Jolo Dititi jo Ari, Baru pe Padalanon Sada Ulaon

Di sada huta na margoar Huta Pareman, toppu ma adong sada kegiatan na margoar lomba balap. Alai, hera piga-piga ari andorang so sahat tikkina, gok ma ro akka masukan, kritikan, komentar dohot lan singot-singot, jala tarlumobi ro do nasehat sian Paddita asa anggiat ma nian, nipapidda perlombaan i tu inganan na dumenggan mardomu tu ulaon balap i.

SIAN Abhotneo Naibaho

Tap…ujungna sahat ma di ari naung nitottuhon akka parhobas na i perlombaan i. Lam marjugul nasida, dang dibege pe akka singot-singot, masukan, nasehat dohot ragam na komentar. Mardalan do ulaon i nian sian na manogot sappe ro tu botari.

Ia ulaon lomba balap kareta i jala bertepatan do di ari Paskah, ima ari ni hananaek ni Tuhan Jesus di akka na porsea tu ibana. Jonok tu inganan parlumbaan balap kareta i, jala jonok hian do dua bagas joro ima inganan parmingguan ni akka halak Kristen. Toppu ma nian, akka soara bising sian kanalpot ni kareta na marlumba i. Tottu, tarbege ma tu parmingguan, jala mohop do pinggol mambege soara ni knalpot resing i.

Dada holan soara knalpot na mambahen pinggol gabe mohop, dohot do tong, arus lalu lintas masset, gok akka mobil, kareta mangantri disiala adong perubahan dalan arus lalu lintas sian na biasana.

Mardomu tu si, ragam akka panurat roma tu inganan parlumbaan balap i, na laho manukkun tu parhobas ni ulaon i boasa ikkon dibahen ulaon i di pusat huta i, jala boasa ma dipatupa di ari Paskah. Marpanukkun do tong akka panurat tu akka sosok na berkompeten na boi mambahen alus dohot komentar di ulaon i. Aha ma didok nasida, “Ai…dang diboto hami na ari Paskah sadari on”. Jala na mangalusi sungkun-sungkun i, ra halak Kristen do nasida. Alai, boasa ma dang diboto na ari Paskah sadari on ate.

Lam margorgor akka komentar sappe tu media sosial. Adong ma i na mandok, “ia anak SD pe diboto do mamereng kalender. “Boasa ma akka parhobas i dang mamboto akka ari libur nasional dohot ari-ari keagamaan ate?” ninna akka netizen.

Judul di ginjang, jotjot do tabege ra di pesta, di gareja, manang di partukkoan. Menurut ahu, dang holan hata-hata sambing kalimat i. Godang do hasintonganna. Ido labana adong songon almanak, kalender, jom na marlapatan songon waktu manang jadwal di hita jolma.

Pola ma lolos parbinotoan ari sadari on ima ari hananae ni Tuhan Jesus. Dang porsea ahu di si selaku panurat ni catatan on.

Terakhir, songon na paingotton di hita, lam manat ma hita molo tung pe adong songon rencana na laho mambahen sada-sada ulaon. Sai unang ma nian, gabe batu sandungan hita di jolo ni donganta jolma. Songoni ma sian ahu, mauliate.


https://bataktoday.com/jolo-dititi-ari-asa-padalanon-sada-ulaon